مارک ساڤایا، نێردەی تایبەتی سەرۆکی ئەمریکا بۆ کاروباری عێراق، رایگەیاند فەرمانی دەستبەکاربوونی لە دۆناڵد ترەمپ، سەرۆکی ئەمریکا وەرگرتووە.
ساڤایا، لە پۆستێکدا لە تۆڕی کۆمەڵایەتیی ئێکس، خۆشحاڵیی خۆی بە دیداری ترەمپ دەربڕی و نووسیبووی، “زۆر خۆشحاڵ بووم بە بینینت بەڕێز سەرۆک، بەڕاستی بەشێوازێکی نایاب رۆژی سوپاسگوزاریمان بەسەربرد.”
رۆژی 19ـی تشرینی یەکەمی 2025، دۆناڵد ترەمپ، سەرۆکی ئەمریکا مارک ساڤایای وەکو نێردەی تایبەتی ئەمریکا بۆ عێراق دەستنیشان کرد.
ساڤایا، بازرگانێکی ناسراوی بە رەچەڵەک عێراقییە و لە شاری دیترۆیتی میشیگن نیشتەجێیە. ئەو بە چالاکییەکانی لە تۆڕە کۆمەڵایەتییەکان و نزیکیی لە ترەمپ ناسراوە، کە چەندین جار پێکەوە دەرکەوتوون و وێنەیان بڵاوکردووەتەوە.
دۆناڵد ترەمپ، لەبارەی دەستنیشانکردنی مارک ساڤایا رایگەیاندبوو، “تێگەیشتنی قووڵی مارک لە عێراق و ئەمریکا، لەگەڵ پەیوەندییەکانی لە ناوچەکەدا، یارمەتیدەر دەبن بۆ بەرەوپێشبردنی بەرژەوەندییەکانی خەڵکی ئەمریکا.”
سەرەڕای متمانەی ترەمپ، بە گوێرەی زانیارییەکانی پەیجی تایبەتی ساڤایا لە پلاتفۆرمی لینکدئین، هیچ ئەزموونێکی پێشووی لە کاروباری حکومی لەسەر ئاستی ناوخۆیی، ویلایەت یان فیدراڵیی ئەمریکا نییە. ساڤایا، لە بواری بازرگانیدا کار دەکات و خاوەنی زنجیرەیەک دەرمانخانەی تایبەتە لە دیترۆیت بە ناوی “لیف و بەد”.
دوای دەستنیشانکردنی، مارک ساڤایا، لە پێگەی تایبەتی خۆی لە ئینستاگرام سوپاسی ترەمپی کرد و نووسیبووی: “زۆر شەرەفمەند و سوپاسگوزارم بۆ سەرۆک دۆناڵد ترەمپ کە منی وەکو نێردەی تایبەتی خۆی بۆ کاروباری عێراق دەستنیشان کرد. پابەند دەبم بە بەهێزکردنی هاوبەشیی ئەمریکا و عێراق لەژێر سەرکردایەتی و رێنوێنیی سەرۆک ترەمپ.”
مارک ساڤایا، لە ساڵی 1985 لە عێراق لەدایکبووە و لە ساڵانی 1990ـەکاندا لەگەڵ خێزانەکەی کۆچی کردووە بۆ ئەمریکا و لەو کاتەوە لەوێ نیشتەجێیە.
