کێ سکاڵای دژی حوسێن رابی تۆمار کردووە و بۆ لە ئاسایش زیندانی کراوە؟
دەستگیرکردنی مامۆستایەکی زانکۆ لەلایەن ئاسایشی سلێمانییەوە کاردانەوەی زۆری تۆڕە کۆمەڵایەتییەکانی لێکەوتووەتەوە. سکاڵاکار ئوسامە جەمیل، بەربژێری سەرنەکەوتووی هەڵبژاردنی پەرلەمانی عێراقە لە فراکسیۆنی یەکگرتوو، پارێزەرەکەی هۆکاری بردنی کەیسەکە بۆ ئاسایش روون دەکاتەوە و ئاماژە بەوەش دەکات، “دەتوانرێت بە دەستەبەری ئازاد بکرێت.”
حوسێن حوسێنی، یان حوسێن رابی، فیزیاناس و مامۆستای زانکۆ لە شاری سلێمانی، کە خەڵکی شاری سەقزی رۆژهەڵاتی کوردستانە، چوارشەممە 26ـی ئەم مانگە کەسوکارەکەی رایانگەیاند، “بێسەروشوێنە” دواتر ئاسایش ئاشکرای کرد، سکاڵای لەسەر تۆمار کراوە و دەستگیریان کردووە.
خالید ماوەتی، بەڕێوەبەری ئاسایشی سلێمانی بە تۆڕی میدیایی رووداوی گوت: “حوسێن رابی بە بڕیاری دادوەر دەستگیرکراوە و لە ئاسایش راگیراوە”.
بۆچی ئاسایش حوسێن رابی دەستگیرکردووە؟
چالاکڤانان و نووسەران لە تۆڕە کۆمەڵایەتییەکان بۆ دەستگیرکردنی حوسێن رابی لەلایەن ئاسایشەوە نیگەرانیی خۆیان دەردەبڕن و دەڵێن، دەبوو پۆلیس دەستگیری بکات. پارێزەرێکیش هۆکاری دەستگیرکردنەکە لەلایەن ئاسایشەوە لە رووی یاساییەوە دەخاتەڕوو.
بەکر حەمەسدیق، پارێزەری سکاڵاکار ئوسامە جەمیلە و ئەمڕۆ هەینی بە تۆڕی میدیایی رووداوی گوت: “بەشێک لە ئاسایش هەیە پێیدەگوترێت هۆبەی تاوانە ئەلیکترۆنییەکان، لە پۆلیسیش بنکەیەکی هاوشێوە هەیە، ئەوانەی ناوی سیانی و شوێنی نیشتەجێبوونیان دیارە لە پۆلیس سکاڵا دەکەیت و کارەکان دەکرێن، بەڵام کەسانێک نەناسراو بن، سکاڵاکە لە ئاسایش تۆمار دەکرێت”.
حوسێن رابی مامۆستای زانکۆیە و ناسراوە، بەڵام پارێزەرەکەی ئوسامە جەمیل گوتی: “نەمان زانیبوو مامۆستای زانکۆیە، تەنانەت ناوی سیانیشیمان نەدەزانی بۆیە دۆسیەکەمان بردە ئاسایش، چونکە لەوێ بۆ دۆزینەوەی کەسانی نەناسراو رێکاری پێشکەوتوو و خێرا هەن”.
ئەو مادەیەی حوسێن رابی پێ دەستگیرکراوە
پارێزەر بەکر حەمەسدیق گوتی: “تۆمەتبارەکە [حوسێن رابی] بە تۆمەتی گوتنی قسەی نەشیاو بە مامۆستا ئوسامە جەمیل دەستگیرکراوە، مادەکەشی مادەی دووە لە خراپ بەکارهێنانی ئامێرەکانی پەیوەندی”.
حوسێن رابی چی بە ئوسامە جەمیل گوتووە؟
لە ماوەی بانگەشەی هەڵبژاردنی پەرلەمانی عێراقدا، حوسێن رابی، مامۆستای بەشی فیزیا لە زانکۆی سلێمانی لە فەیسبووکی خۆی 18 پۆستی دژی ئوسامە جەمیل کردووە و لە زۆربەی پۆستەکاندا هێرشی دەکاتە سەر.
دەقی مادەی دوو لە یاسای خراپ بەکارهێنانی ئامێرەکانی پەیوەنیکرد ئەمەی خوارەوەیە:
هەرکەسێک بە خراپی تەلەفۆن (مۆبایل) یان هەر ئامێرێکی پەیوەندیکردن؛ ئینتەرنێت یان پۆستی ئەلیکترۆنی بۆ مەبەستی هەڕەشە، یان تۆمەت هەڵبەستن یان جنێودان و بڵاوکردنەوەی هەواڵی هەڵبەستراو بەکارهێنا کە ترس پەیدا دەکات، یان دزەی بە گفتوگۆکردن یان وێنەی چەسپاو و جووڵاو، یان کورتە نامەی بڵاوکردەوە کە لەگەڵ خوو و رەوشتی گشتی دا نەگونجێ، یان بەبێ پرس وێنەی گرت؛ یان کاروبارێکی وا کە شەرەف بریندار بکات، یان هانی ئەنجامدانی تاوان؛ یان کاری بەدڕەوشتی، یان بڵاوکردنەوەی زانیاری پەیوەیست بە نهێنی ژیانی تایبەت یان خێزانی بۆ تاکەکان بڵاو بکاتەوە، کە بە هەر رێگەیەک بێت چنگی کەوتبن هەتا ئەگەر راستیش بن، ئەگەر بەهۆی بڵاوکردنەوەیان و دابەشکردنیان سووکایەتی یان زیانیان پێ بگەیێنێت، ئەوا [تۆمەتبارەکە] بۆ ماوەیەک بەند دەکرێ لە شەش مانگ کەمتر نەبێت و لە پێنج ساڵیش زیاتر نەبێت، بە پێبژاردنێکیش سزا دەدرێ لە ملیۆنێک دینار کەمتر و لە پێنج ملیۆن دیناریش زیاتر نەبێت، یان بە یەکێک لەو دوو سزایە.
