کەرکووک لە ژنانی گوندنشین و ژنی سەرۆک خێزاندا دووەمی عێراقە

کەرکووک لەسەر ئاستی عێراق دووەمە لە ژمارەی ئەو ژنانەی سەرۆک خێزانن و رێژەی ژنانی گوندنشین لە گوندەکانیدا، ئەوەش بەگوێرەی ئەنجامی کۆتایی سەرژمێریی گشتیی دانیشتووان، کە وەزارەتی پلاندانانی عێراق بڵاوی کردەوە.

بە گوێرەی ئەو ئامارە کە وەزارەتی پلاندانانی عێراق لە 26ی تشرینی دووەمی 2025 بڵاوی کردەوە، کەرکووک لە ریزبەندیی دووەمدایە لەسەر ئاستی عێراق بۆ رێژەی ئەو ژنانەى گوندنشینن.

ژمارەی دانیشتووانی کەرکووک بە دوو ملیۆن و 34 هەزار و 627 کەس هەژمار کراوە، کە یەک ملیۆن و 22 هەزار و 866 یان ژنن، لەوانە 270 هەزار و 927 ژن لە گوندەکانی کەرکووک دەژین، کە 50.30%ی تێکڕای ژمارەی گوندنشینەکان پێکدەهێنن.

پارێزگای سەلاحەدین لە ریزبەندیی یەکەمدایە لە زۆرترین رێژەی ژنانی گوندنشین کە 50.36%ی دانیشتووانی گوندەکانی پێکدەهێنن و 456 هەزار و 882 ژنن.

کەمترین رێژەی ژنی گوندنشین لە پارێزگای سلێمانییە، کە 47.93% دەبێت و ژمارەیان 126 هەزار و 830 ژنە.

یەکێک لە ئامارەکانی دیکەی سەرژمێری تایبەتن بەو ژنانەی سەرۆک خێزانن؛ پیاوان سەرۆک خێزانی زیاتر لە حەوت ملیۆن خێزانن لە عێراق، ژنان سەرۆک خێزانی زیاتر لە 910 هەزار خێزانن.

کەرکووک لە ریزبەندیی دووەمدایە لەسەر ئاستی عێراق لە رووی ژمارەی ئەو خێزانانەی ژن سەرۆک خێزانن، کە 13.65%ی خێزانەکان پێکدەهێنن، لە کاتێکدا بەغدا لە ریزبەندی یەکەمدایە لە سەرۆک خێزانیی ژن کە 13.85% دەبێت، کەمترین سەرۆک خێزانیی ژن لە دیوانییەیە، کە 8.58%ی خێزانەکانی ئەو پارێزگایە پێکدەهێنن.

ئەحمەد کەرکووکی، ئەندامی ئەنجوومەنی پارێزگای کەرکووک بە رووداوی راگەیاند: زۆریی سەرۆک خێزانیی ژن لەو پارێزگایە پەیوەندیدارە بە زۆریی رێژەی جیابوونەوە و زۆریی ژمارەی ژنانی بێهاوژین، ئەوەی پەیوەندیدارە بە زۆری ژمارەی ژنانی گوندنشین، پەیوەندى بە زۆریی ژمارەی گوندەکانی ئەو پارێزگایەوە هەیە.